Roxas City – Temporaryo nga gin-untat sang katapo sang Municipal Disaster Risk Reduction and Management Office (MDRRMO) sang Maayon, ang pagpatigayon sang search and retrieval operation sa 85-anyos nga senior citizen nga ginpahayag nalumos sa suba sa Barangay Tuburan sa amu nga banwa.
Sa interview sang Bombo Radyo kay SFO4 Junar Diestro Municipal Fire Marshal sang Maayon, ginpahayag sini nga yara sa
33 ka mga rescuer ang nagpadulong sa lugar agud magpatigayon sang search and rescue operation apang napaslawan sila nga makit-an ang biktima bangud tuman ka lubog ang tubig kag madalum ang suba.
Suno kay Diestro, ika-duha ka beses nga ginsuoy sang mga diver ang suba sa paglaum nga makit-an ang senior citizen apang bangud sa mga dagutdot kag mga kawayan nga yara sa idalum sang suba nabudlayan ang mga ini rason nga temporaryo nila nga gin-untat ang pagpatigayon sang search and retrieval operation apang, magapadayon sila liwat subong nga adlaw.
Bangud sini, nadesisyunan sang katapo sang MDRRMO nga maggamit na sang backhoe agud nga mapadasig ang pagpangita sa nadula nga biktima.
Matandaan nga ba-se sa impormasyon nagikan sa Maayon PNP,
padulong kun tani sa balay sang iya bata si Ludovico Magallanes Mapa sang ini ang gina-alegar nadanlog kag gin-anud sang makusog nga current sang tubig kahapon nga adlaw Marso 1.
Panugyan sini sa mga taga Maayonanon ilabi na ang mga malapit sa suba nga likawan magtabuk kun mataas kag mabaskog ang tubig agud malikawan ang kasubong sini nga hitabo.
