Nagapadayon ang search operation sa isa ka mangingisda nga naglumpat sa ginasakyan nga baroto sa kadagatan nga natung-an sang Barangay Olotayan kag Masbate matapos ginbungguan ang ila baroto sang isa ka barko sang damlag lang.
Ginpahayag ni Philippine Coastguard (PCG) Station Commander –Roxas Joe Luviz Mercurio nga gikan sa Aklan ang tatlo ka mga mangingisda kag nagapangisda sa kadagatan sang Roxas City sang gin-alegar ginbungguan sang wala mahibaluan nga barko.
Ginkilala ang missing nga mangingisda nga si Rex Peralta nga ginaalegar nalumpat matapos nagbunggo ang barko sa ila baroto.
Sa pihak nga ginsulod na sang tubig ang baroto, nagpabilin ang duha ka mga mangingisda kag nag-uyat lamang sa ila baroto tobtob nag-abot ang bulig nga amo ang nagguyod sa ila pabalik sa Aklan.
Gilayon sila nga nagreport sa PCG-Aklan nga amo naman ang nagpakig-angut sa PCG-Roxas nga gilayon ginpangita ang naglumpat nga mangingisda.
Padayon sa karoN ang imbestigasyon sang PCG agud matumod kun ano nga barko ang ginaalegar nagbunggo sa baroto sang mga mangingisda.
