ROXAS CITY – Hugot ang pagbantay sang mga otoridad sa banwa sang Pilar nga isa sa ginakabig nga election watchlist areas sa probinsya sang Capiz sa nagahilapit nga 2019 midterms elections.
Sa exclusive interview sang Bombo Radyo Roxas kay Police Captain Alfred de Leon, hepe sang Pilar PNP, nalakip sa category orange ang banwa sang Pilar bangud sa intense political rivalry kag presensya sang mga rebelde nga New People’s Army ukon NPA sa ila banwa partikular na sa Barangay Monteflor.
May gindihon na nga contingency plan ang Commission on Election (COMELEC) agud masiguro nga wala sang magaluntad nga kinagamo sa Pilar sa maabot nga eleksyon.
Nagpangabay man ang ahensya nga dugangan ang security personnel gikan sa Philippine National Police kag militar sa nasambit nga banwa.
Tinutuyo sini nga mapasiguro nga mangin malinong kag matawhay ang patigayunon nga piniliay kag mangin handa ang mga otoridad sa tiun nga may matabo nga insidente.
Nahibaluan nga magluwas sa banwa sang Pilar nalakip man sa election watchlist areas sa probinsiya ang banwa sang President Roxas, Cuartero kag Tapaz.
