Ginkumpirmar ni Senate President pro-tempore Ping Lacson nga pagabuslan si Senator Imee Marcos bilang Chairman sang Senate Committee on Foreign Relations.
Suno kay Lacson, ginpahibalo na ni Senate Majority Leader Migz Zubiri si Sen. Imee kaangut sa sini nga plano, kag ginalauman nga ang pagbag-o sang committee chairmanship matabo sa masunod nga semana.
Ginalantaw man nga si Senator Erwin Tulfo ang magabulos kay Sen. Marcos sa Foreign Relations Committee.
Ginpaathag ni Lacson nga ang Committee on Foreign Relations, pareho sang Blue Ribbon Committee, isa ka daku kag importante nga Committee nga ginahatag sa majority bloc.
Apang gin-athag man niya nga wala siya kahilabtanan sa desisyon nga ginakasugtan sang majority caucus sang Lunes.
Samtang, bilang pagpakita sang pag-abi-abi, nagpahayag si Senator Kiko Pangilinan nga handa siya ihatag kay Sen. Imee Marcos ang chairmanship sang Senate Committee on Constitutional Amendments and Revision of Codes and Laws, kag nakadepende na lang sa senadora kun batunon niya ini ukon indi.
