Ginkumpirma ni Senate Ad Hoc Committee chairperson Sherwin Gatchalian nga magahiwat sang una nga hearing ang komitiba sa buwas nga adlaw, may kaangtanan sa epekto sang krisis sang nagalala nga tensyon sa Middle East sa pungsod.
Suno kay Gatchalian, usisaon sang komite kon bala ang pondo sa General Appropriations Act 2026 ang bastante agud masabat ang epekto sang krisis nga gintuga sang tensyon sa tunga sang Estados Unidos sang America, Israel kag Iran.
Dugang pa sang senador nga posible maapektuhan ang seguridad sa pagkaon bangud sa pagsirado sang Strait of Hormuz nga isa ka importante nga alagyan para sa international trade sa langis, natural gas kag bisan sa abono.
Bangud sa kabug-at sang sitwasyon, gin-schedule ni Gatchalian ang hearing bisan pa nga naka-break ang Kongreso sa tion sang Semana Santa.
Pahayag niya, kinahanglan nga magsumite ang mga ahensya sang gobyerno sang ila tagsa ka contingency plans nga sarang ma-unify, lakip na ang pagpanghanda para sa worst-case scenarios.
Kaangot sini, ginsuhestyon sang senador ang savings sang gobyerno, lakip na ang, pagnubo sang work travel, pagsaylo sa online training kag paglimit sang representation expenses nga ginapahayag makatipid sa gobyerno tubtob sa P90 bilyon.
Samtang, sa tunga sang krisis, nagpanawagan si Gatchalian sa mga kumpaniya sang langis nga indi paghimuslan ang sitwasyon.
Nagalaum suno sa iya nga may yara sila sang konsensya kag maglikaw sa pagtipon kag indi makatarunganon nga pagpataas sang presyo sang langis.
