Gintugutan sang Senate Impeachment Court ang request sang House prosecution nga mag-isyu sang subpoenas para sa record sang bangko, Bureau of Internal Revenue (BIR), kag Anti-Money Laundering Council (AMLC) ni Vice President Sara Duterte kag sang iya bana nga si Atty. Manases “Mans” Carpio.
Suno kay Presiding Officer Senator Francis “Chiz” Escudero, ang request ang nakalab-ot sa requirements sang korte bangud ang mga dokumento nga ginapangayo reasonably described, readily identifiable, kag prima facie relevant sa Article II sang Articles of Impeachment.
Sakop sang subpoena ang mga rekord sang bangko, BIR kag AMLC humalin 2007 tubtub 2021, nga suno sa impeachment court ang magaserbe nga basehan sa pag-usisa sang alegasyon sang wala mapaathag nga manggad kag indi bilang bag-o nga impeachment charge.
Samtang, gin-aprubahan man sang korte ang subpoena para sa bank kag AMLC records sang 19 ka mga corporate entities kag isa ka partnership nga may kaangtanan kay Duterte kag Carpio, apang wala ginlakip ang duha ka kompaniya bangud sa kakulang sang bastante nga prima facie relationship.
Ginpanindugan ni Escudero nga indi mahimo nga gamiton ang confidentiality provisions sang Anti-Money Laundering Act agud punggan ang pagsunod sa isa ka lehitimo nga subpoena sang Senate Impeachment Court.
