Nagpanawagan si Senate President Alan Peter Cayetano sa Office of the Ombudsman nga ilakip man sa preventive suspension si National Bureau of Investigation (NBI) Director Melvin Matibag may kaangtanan sa shooting incident nga gintunaan sang lockdown sang Senado sang Mayo 13.
Sa isa ka Facebook Live, ginkwestyon ni Cayetano ang mga reports kag narratives nga ginpahayag nakalab-ot kay President Bongbong Marcos angut sa natabo sa sulod sang Senado.
Nahibaluan nga una na nga nagmandu si Ombudsman Jesus Crispin Remulla sang anum ka bulan nga preventive suspension batok kay Acting Senate Sergeant-at-Arms Mao Aplasca may kaangtanan sa tensyon sa tunga sang personnel sang Office of the Sergeant-at-Arms (OSAA) kag NBI operatives.
Suno kay Cayetano, ginbaton niya sa maayo nga tinutuyo ang pahayag sang Presidente nga nagamandu sa mga otoridad nga mag-withdraw, apang iya ginkwestyon kon husto kag kumpleto ang impormasyon nga nabaton sang Malacañang.
Pahayag pa niya importante indi lamang ang resulta sang imbestigasyon kundi lakip ang proseso sini, kag ginpanindugan ang kinahanglanon sang patas kag independente nga imbestigasyon.
Dugang pa sini nga may yara sang obligasyon nga ipahibalo gilayon sa Senado ang mga detalye sa pagbulos kay Aplasca kag masiguro ang seguridad sang institusyon, ilabi na nga natalana nga magasugod ang impeachment proceedings sa Lunes.
