Ginpakamalaot ni Senador Erwin Tulfo ang pagkondenar sang Chinese Embassy sa mga pahayag sang pila ka opisyal sang Pilipinas angut sa isyu sang West Philippine Sea.
Suno kay Tulfo, wala sang kinamatarong ang Chinese Embassy nga sitahon ang mga opisyal sang pungsod bangud sa ila mga pahayag batuk sa gina-alegar pag-agaw sang China sa teritoryo sang Pilipinas.
Ginpanindugan sini, kun indi pagbatunon sang mga opisyal sang embahada kon paano naga-obra ang demokrasya sa pungsod, mahimo sila maghalin sa ano man nga oras.
Ginhatagan man pagtamod sang senador nga nakasaad sa Philippine Constitution ang freedom of speech gani nagakadapat nga respetuhon sang mga dumuluong.
Dugang pa sini nga ang amo nga kahilwayan wala nagaluntad sa China sa diin ang mga kritiko ang ginapreso kag ang media ang ginapahipos.
Nagtuhaw ang isyu matapos ginpahayag ni Chinese Embassy Deputy Spokesperson Guo Wei nga indi lisensya ang freedom of speech agud pakalainon ang lider sang iban nga pungsod.
Gintudlo man ni Guo ang internet post sang Philippine Coast Guard spokesperson Commodore Jay Tarriela nga nagapakita sang AI-generated video ni Chinese President Xi Jinping.
Kaangot sini, ginpanindugan ni Tulfo nga kun luyag sang mga Chinese officials ang respeto sang mga Pilipino, dapat anay respetuhon ang Philippine Constitution kag kilalahon nga indi ila ang pungsod.
