MAMBUSAO, CAPIZ – May yara sang foul play sa kamatayon sang isa ka senior citizen nga nasapwan nabukid nga bahin sang Barangay Burias, Mambusao, Capiz.
Ang biktima amo si alyas ‘Diday’ 74-anyos kag residente man sang nasambit nga lugar.
Sa interview sang Bombo Radyo kay Police Major Narciso Sables Jr., Officer in Charge sang Mambusao Municipal Police Station, iya ginpahayag nga sa panaysayon sang asawa sang biktima nga si alyas ‘Feloteo’, 80-anyos, naglakat ini agud magbakal kuntani sang mga panakot sa kusina apang wala na ini makapauli.
Suno kay Sables, posible nga may yara sang foul play bangud sang sako sang bugas nga nakahigot sa li-og sang biktima sang masapwan ini.
Pahayag pa niya, may mga persons of interest na sila nga ginalantaw sa nagkalain-lain nga anggulo nga posible may kahimuan sang amo nga insidente.
Sa subong, ginahulat na lang sang kapulisan ang resulta sang autopsy sa bangkay sang biktima agud matumod ang cause of death sini.
Nagapanawagan man ang mga himata sang biktima sa mga may nahibaluan sa insidente ang magpadulong sa otoridad agud nga mas mapadasig ang pagsolbar sang kaso.
INTERVIEWED BY: BOMBO ROADNIE DABAN DALANON VIA ZONA LIBRE
