Senior citizen, patay matapos maaksidente ang ginamaneho nga tricycle

ROXAS CITY – Patay ang isa ka senior citizen matapos maaksidente ang iya ginamaneho nga tricycle sa Barangay Bunga, Mambusao, Capiz.

Ginkilala ang biktima kay Apolinario Lindo, 69 anyos kag residente sang Barangay Libo-o, Mambusao, Capiz.

Base sa inisyal nga impormasyon, nagikan sa ila nga balay ang biktima kag magapadulong kuntani sa banwa sang Jamindan sakay sa iya nga tricycle.

Apang pag-abot sang likuon nga porsyon sang dalan sa lugar, aksidente nga naglapaw sa dalan ang tricycle nga ginamaneho sini rason nga nahulog ini sa kanal nga nagresulta sa pagtampilak sa dalan sang biktima.

Bangud sa mabaskog nga impact, nalampos ang ulo sang biktima sa matig-a nga bagay nga nagresulta sa iya nga kamatayon.