ROXAS CITY – Pilason ang senior citizen matapos bumunggo ang ginamaneho nga motorsiklo sa ginasundan nga traysikol sa Provincial Highway sang Brgy. Nagba banwa sang Cuartero.
Ginkilala ang driver sang traysikol kay Joel Lope, 49-anyos, mangunguma kag residente sang amo nga banwa.
Samtang ang driver sang motorsiklo amu si Nestor Balbino, 60 anyos kag residente sang Brgy Mainit sang nasambitan nga banwa.
Sandig sa imbestigasyon sang Cuartero Municipal Police Station, naka-signal light kag magaliko kuntani pa-wala ang traysikol sakay ang iya backrider bangud yara na ini sa iya balay sang aksidente ini nga mabungguan sang naga-sunod nga motorsiklo.
Ginpahayag man sang backrider sang traysikol nga madasig ang pagpadalagan sang amo nga motorsiklo.
Bangud diri, nag-angkon sang kapilasan sa magkatuhay nga parte sang lawas ang driver sang motorsiklo.
Madasig naman nga ginrespondehan sang Cuartero Emergency Rescue Unit (CERU) ang senior citizen kag ginpadangat sa Dao District Hospital para sa dugang nga pagbulong.
Maswerte naman nga wala napilasan ang driver sang traysikol kag ang kaupod nga backrider.
Sa karon, yara na sa kustodiya sang Cuartero MPS ang motorsiklo para sa nagakaigo nga disposisyon.
