PONTEVEDRA, CAPIZ — Nag-angkon sang pilas sa magkatuhay nga parte sang lawas ang isa ka senior citizen matapos mabungguan samtang nagatabok sa dalan sa Barangay Esperanza, Pontevedra, Capiz.
Ang biktima amo si alyas “Zenaida”, 63-anyos kag residente sang Barangay Binuntucan Pontevedra, Capiz.
Sa impormasyon nga nakuha sang Bombo Radyo Roxas sa Pontevedra Municipal Police Station, ginpahayag nga nagatabok ang biktima sa dalan sang hinali ini mabungguan sang motorsiklo nga Rusi nga itom nga ginamaneho ni alyas “Aries”, 38-anyos, isa ka laborer, upod ang iya angkas nga menor de edad, nga lunsay residente sang Barangay Dulangan, Pilar, Capiz.
Nahibaluan nga halin pa sa Barangay Bailan ang motorsiklo kag nagapauli kuntani sang natabo ang insidente.
Bangud sang mabaskog nga impact, nag-angkon sang pilas sa nanari- sari nga parte sang lawas ang biktima kag ang duha nga sakay sang motorsiklo.
Gilayon man nga nagresponde ang mga katapo sang Pontevedra Emergency Response Team kag gindapatan sang pauna nga pagbulong ang mga napilasan antes ginpadangat sa nagkalain-lain nga ospital.
Sa karon, yara na sa paghinakop sang Pontevedra PNP ang motorsiklo para sa nagakaigo nga disposisyon.
