ROXAS CITY – Pilason ang isa ka senior citizen matapos nabungguan sang isa ka motorsiklo sa national highway sang Brgy. Cagay, Roxas City.
Ginkilala ang biktima kay alyas Raul, fish vendor 61-anyos nga kag residente sang Kilometer 2, Brgy. Lawa-an, Roxas City samtang ang ginatudlo nga driver suspek amu si alyas Ronel, 43-anyos residente sang Brgy. Cagay Roxas City.
Base sa impormasyon nga nagikan sa Roxas City PNP, ginpahayag nga samtang nagatabok ang senior citizen sa karsada sang hinali na lamang ini nga nabungguan sang motorsiklo.
Bangud sini, nag-angkon sang pilas sa natuo nga paa kag sa magkatuhay nga lawas ang senior citizen kag subong man ang driver sang motor nga gilayon naman nga ginpangdala sa magkatuhay nga ospital sa syudad sang Roxas agud dapatan sang nagakaigo nga pagbulong.
Ginapahayag nga yara sa impluwensya sang makahulubog nga ilimnon ang driver sang motorsiklo.
Sa karon, yara na sa paghinakop sang mga otoridad ang motorsiklo kag naka-hospital arrest naman ang driver sini.
