ROXAS CITY-Pilason nga gindala sa isa ka pribado nga ospital ang isa ka senior citizen matapos gina-alegar nga ginbungguan sang salakyan sa Barangay Dumulog, Roxas City.
Ginkilala ang biktima nga si Moises Andrada 61-anyos residente sang nasambit nga lugar.
Sa inisyal nga imbestigasyon sang mga kapulisan nagaguwa nga samtang nagatindog ang biktima malapit sa iya nga tricycle , aksidente ini nga nabungguan sang Toyota Fortuner nga ginamaneho ni Jovern Loretizo, 27-anyos sang Barangay Poblacion, President Roxas, Capiz.
Bangud sa tuman ka baskog sang pagkabunggo, ginapahayag nga natumba sa dalan ang biktima.
Nag-angkon sang pilas sa ulo ang biktima nga gindala sa Capiz Emergency Response Team (CERT) sa isa ka pribado nga ospital.
Samtang ang driver naman sang salakyan ang yara na karon sa kustodiya sang mga kapulisan para sa nakaigo nga disposisyon.
