Dakop ang 17 anyos nga solterito matapos magtuyo nga pasudlon ang shabu nga ginbutang sa mga tangkong sa pagbisita sa Bureau of Jail Management and Penology-Aklan (BJMP-Aklan) sa Barangay Nalook, Kalibo, Aklan.
Ang solterito amo si alyas Dadong, residente sang Barangay Bugasongan Lezo, Kalibo.
Sandig sa imbistigasyon, nagbisita si Dadong sa jail facility nga may dala nga karne kag tangkong nga ginaalegar para sa isa ka inmate.
Apang sang gin-inspect sang mga jail guards ang dala sini nga tangkong, nadiskubrehan nga may nakaipit nga apat ka sachet sang ginapatihan shabu.
Magluwas sa apat ka sachet sang shabu, narekober man ang pila ka mga nakarolyo nga aluminum foil sa tangkong.
Suno kay Dadong, wala siya sang kahilabtanan sa nakuha nga droga bangud nasugoan lamang siya nga magbisita sa jail facility kag dal-an sang karne sang baboy kag tangkong ang isa ka inmate.
Natukiban nga ini na ang ika-duha ka beses nga nagbisita ang solterito sa jail facility.
Gin-turnover man ang 17 anyos sa Department of Social Welfare and Development samtang nagapadayon ang imbestigasyon sa nasambit nga insidente.
