Tuig 2001 sang nangin co-accused si Atong Ang ukon Charlie Tiu Hay Sy Ang sa impeachment trial ni anay President Joseph “Erap” Estrada.
Sandig sa mga report, ginhatagan ni Estrada sang otridad si Ang nga magdumala sang illegal gambling business nga ginatawag nga jueteng.
Ini ang ginaalegar ginkaakig ni anay Ilocos Sur Governor Luis “Chavit” Singson bangud naapektohan ang iya nga negosyo.
Gani si Singson ang nangin witness batuk kay Estrada kag kay Ang.
Suno sa iya, ginbulsa nanday Estrada kag Ang ang P130 million nga pondo halin sa excise taxes sang sigarilyo.
Kag ini ang ginaalegar nangin rason kun ngaa ginkakas sa posisyon bilang presidente si Estrada.
ANO ANG NATABO GILAYON KAY ATONG ANG?
Matapos ginpahalin sa pwesto si Estrada, nagpadulong si Ang sa Estados Unidos kag nadakpan nga nagasugal sa Las Vegas.
Nakapyansa ini sang $300,000 ukon masobra P16 million kag nagpabilin sa Estados Unidos samtang na-house arrest.
Apang sang tuig 2006, ginbalik si Ang sa Pilipinas.
Nagsugot si Ang sa plea bargaining kag gin-ako nga ginkuha ang P130 million nga excise tax sang sigarilyo kag personal nga gin-deliver kay Estrada.
Ini ang nagasantu sa testimoniya ni Singson.
Kabahin sang plea bargain amo ang pagbalik sang P25 million nga nabaton sini bilang commission nagikan sa ginkuha nga excise tax sang sigarilyo.
Sang 2009, pormal nga gindeklara sang Sandiganbayan Special Division nga terminated na ang probation ni Ang kag nangin hilway na ini.
ANO SUBONG ANG TRABAHO NI ANG?
Suno sa iya, isa siya ka negosyante kag nagapadalagan sang legal nga gambling businesses.
Nangin consultant siya sa mga legal gaming companies kaangay sang Meridien Vista Gaming sa Cagayan.
Siya ang isa sa mga nagtukod ang Ultimate Fighting Cock Championship (UFCC), kag gin-rebrand ang iya kaugalingon bilang cockfighting enthusiast.
Siya ang naga-finance sang mga cockfighting teams kag ginapadala ini sa mga high-roller competitions. Ang goal sang UFCC amo nga mag-promote sang disiplina, respeto, sportsmanship kag camaraderie sa mga cock-fighting fans.
Ginapahayag nga ang iya mga negosyo ang nagaganar sang minilyon ka pesos kada adlaw.
Tuig 2017, gin-akusaran ni Ang ang pila ka mga opisyal nga luyag siya nga patyon agud ma-control ang operasyon sang sugal.
Samtang, ginsuportahan man sini si anay President Rodrigo Duterte nga naghingyo man sa iya sadto nga buligan ini nga papason ang illegal gambling sa pungsod.
Gin-ako ni Ang nga isa siya ka gambling lord apang nagapanindugan nga legal ang tanan niya nga negosyo.
