Generally peaceful ang nangin selebrasyon sang Sinadya Festival 2024.
Ini ang ginpahayag ni PLTCOL Lumyaen D Lidawan, Officer in Charge sang Roxas City PNP sang mainterview sang Bombo Radyo.
Ginpahayag sini nga nangin matawhay man ang selebrasyon sang syudad kag may yara lang sang minor incident nga nahitabo kasubong sang isa ka cellphone snatching, pick pocket, kag tatlo ka mga kabataan nga nadula naga- edad sang anom, pito kag tatlo ka tuig apang madasig man ini nga nakita kag nabalik sa ila ginikanan.
Samtang pahayag pa ni Lidawan nga, sa bulig sang nagkalain-lain nga ahensya, force multipliers kag kooperasyon sang mga pumuluyo nangin matawhay ang pagsaulog sang syudad sa kapistahan sang Immaculada Concepcion.
Luyag man pasalamatan ni Lidawan ang mga nag-upod sa Roxas City PNP sa pagbantay sa seguridad sang mga pumuluyo kag magapabilin ang kalinong kag katawhay samtang ginapatigayon ang nagkalain-lain nga aktibidad.
Mahibaluan magluwas sa PNP, yara man ang presensya sang mga katapo sang Philippine Coast Guard, Philippine Army, Bureau of Fire Protection, Highway Patrol Group, Capiz Aviation Security Group, Maritime Group, SWAT, City Disaster Risk Reduction and Management Office (CDRRMO), Provincial Disaster Risk Reduction and Management Office (PDRRMO), City Health, Traffic Management Unit, BPAT kag madamo pa.
