IVISAN CAPIZ – Ginpetisyonan sang katorse (14) ka mga Sangguniang Kabataan nga paga-islan sa pwesto ang ila SK Federation President sa banwa sang Ivisan, Capiz.
Suno sa mga tagreklamo, ginaalegar nga wala may ginaubra ang ila SK Federation President nga si Geraldine Delos Santos Fresco.
Sa interview sang Bombo Radyo kay Punong Barangay Nico Yap sang Barangay Poblacion Norte sa nasambit nga banwa, wala pa ini makabaton sang pormal nga reklamo batok kay SK Federation President Geraldine Delos Santos Fresco, apang nakakabati siya sang pila ka mga alegasyon batuk sa nasambit nga lider.
Ginaalegar nga wala gina-ubra ni Fresco ang iya katungdanan sa ila Barangay, kag wala makapatawag sang pagsinapol sa iya mga SK chairman.
Apang, dugang ni Yap nga naghinyo pa si Fresco sa iya sa bulan sang Enero nga pagagamiton ang Barangay Hall para sa isa ka meeting kaupod ang mga kabataan.
Matandaan nga ginpalab-ot na sa Bombo Radyo ang kaangay sini nga reklamo batuk sa nasambit nga SK sang nagligad nga tuig 2020.
Ginpadulongan man sang Bombo Radyo ang panimalay ni Fresco apang wala ini makapresentar sang iya kaugalingon.
