Ginpatpat sang isa ka abogado ang papel sang small claims sa pagsolbar sang problema sang mga gin-utangan nga ginapabudlayan pa baydan sang mga nagapangutang.
Sa interview sang Bombo Radyo kay Atty. Roman Almalbis, Vice President sang Integrated Bar of the Philippines-Capiz Chapter, iya ginpahayag nga ang Small Claims ang isa ka espesyal nga sangay sang korte nga nagatuyo nga buligan ang mga indibidwal nga madasig maresolba ang mga kaso sang utang ukon simple nga bangayan na indi maglapaw sa balor nga P1M.
Suno kay Atty. Almalbis, diri kag mahimo nga mag-file sang reklamo ang sin-o man nga Pilipino ukon lehitimo nga residente nga may bastante nga ebidensya sang ila nga claim.
Mahimo nga ipasaka sa small claims ang mga kaso nga kasubong sang utang, wala nabayaran nga renta, wala napadala nga produkto ukon serbisyo, kag iban pa nga simple nga transaksyon. Ang proseso gindisenyo agud mangin madasig kag indi komplikado, rason nga indi na kinahanglan sang abogado.
Pahayag pa nya, ang kaso ang gina-file sa regional trial court ukon municipal trial court depende sa lugar sang reklamo. Sa hearing, lunsay plaintiff kag defendant ang pagahatagan sang kahigayunan nga magpaathag, kag masami ginalauman nga makaangkon sang desisyon sa sulod sang 30 ka-adlaw umpisa sang natabo ang hearing. Kun indi mag-uspot ang isa sa partido, mahimo sa gihapon nga ipadayon ang proseso kag desisyon.
Dugang pa sang natungdan, ang Small Claims ang isa ka epektibo nga pamaagi para sa mga pumuluyo nga i-resolba ang ila nga simple nga kaso sang madasig, barato, kag indi kumplikado.
