ROXAS CITY – Wala sang rekord sa barangay ang biktima nga si Wilfredo De Domingo Jr., 22-anyos nga ginbuno-patay sa Sitio Dulunan, Barangay Mongpong sining syudad.
Ini ang ginkumpirmar ni Punong Barangay Ricky Donato, Kapitan sang Barangay Mongpong sang mainterview sang Bombo Radyo.
Suno kay kapitan, boluntaryo nga nagsungka ang mga suspek nga sanday Jascha Tiu Mangalindan 19-anyos, alyas “Rey” 16-anyos kag alyas “JR” 17-anyos (magbarkadahay) lunsay residente sang nasambit nga barangay.
Ginsiling sini nga nakilan-an ang mga suspek bangud gintuad sang kaupod sang biktima nga si alyas “Nonoy” ang mga pangalan sini sa kapulisan.
Gilayon naman nga nag-aksyon ang barangay kag ginsugo ni kapitan ang iya tinawo nga padulungan ang mga balay sang mga suspetsado kag ginpanghambalan nga magsungka na.
Dugang pa ni Kap Donato, ginpahayag ni alyas “Nonoy” nga papuli na kuntani sila sang ginbanggaan sang mga suspek, nagkinagamo tubtob sa naglagsanay kun sa diin nagbulagay sila sang direksyon kag ginapitahan naabtan ang biktima sang mga suspek kag diri ginbuno.
Ginkakibot naman sang mga pumuluyo ang insidente kag kalabanan sa ila ang nagasiling mabuot ang biktima.
Ginatugyan naman ni kapitan ang imbestigasyon sa kapulisan, kag sa pamilya ang desisyon kun ipaidalom sa autopsy ang biktima kag magpasaka sang kaso.
