Ginpasalig ni Speaker Ferdinand Martin G. Romualdez nga magapadayon ang P20 per kilo rice program ni Presidente Ferdinand “Bongbong” R. Marcos Jr., nga ginlunsar sa Visayas bangud sa ginalauman nga pagsaka sang patubas sang humay resulta sang dugang nga suporta sang gobyerno sa sektor sang agrikultura.
Ini ang ginpahayag sang lider sang Kamara sa isa ka interview sa inagurasyon sang Castañas Centro Communal Irrigation System sa Barangay Castañas, Sariaya, Quezon sang nagligad nga Miyerkules.
Ginpahayag ni Speaker Romualdez nga dako ang mabulig sang solar-powered pump irrigation projects (SPIPs) sa pagmentinar sang P20 kada kilo nga programa sang humay bangud makabuhin ini sa gasto sang mga mangunguma kag makadugang sang ila patubas.
Ang solar irrigation project sa Sariaya nagasakop sang 50 ka ektarya kag nagabenepisyo sa 33 ka mga pamilya nga mangunguma, nga karon may nagakaigo kag padayon nga suplay sang tubig kag indi na kinahanglan magsalig sa malahalon nga diesel pump.
Bangud sang solar irrigation system nga gintukod sang National Irrigation Administration (NIA), ang mga mangunguma sa Sariaya nakatipid na karon sing ginabanta nga ₱80,000 kada panahon sang pananom.
Ginhatagan pagtamod ni Romualdez nga sa mga lugar nga may solar irrigation gikan sa NIA, nagtaas ang patubas sang mga mangunguma bangud may kahigayunan sila nga makapananom sang duha ka beses sa isa ka tuig, ipaanggid sang makaisa lang sang una.
