ROXAS CITY – Ginpaathag sang Sugar Regulatory Administration (SRA) –Western Visayas nga ginarekomendar sang industrial sectors ang pag-import sang kalamay sa pungsod.
Ini ang matapos nga nangin kontrobersyal ang Sugar Order No. 4 kun sa diin indi otorisado ni President Ferdinand Marcos Jr. ang pag-import sang 300,000MT nga kalamay.
Sa interview sang Bombo Radyo kay Atty. Guillermo Tejida III, Deputy Administrator of Regulations sang SRA-6, suno diri sang bulan sang Mayo naka-import na sang 200,000MT ang pungsod apang gintalana lamang ang nasambit nga suplay sa mga industrial users kaangay sang manufacturer sang kalamay, gatas, soda drinks kag iban pa.
Aminado si Tejida nga rekomendasyon na sang kadam-an ang pag-import sang kalamay apang indi pa sini matul-id kun gano kadamo ang kinahanglan nga suplay kag kun san o ini iga-import rason nga kinahanglan sang maid-id nga pagtuon.
Gintuad sini nga maluwas sa raw, naga-import man sang refined sugar.
Suno diri, wala sila sang nahibaluan sa pagpaguwa sang Sugar Order No. 4 bangud higher officials lamang ang naghinala kag nagakadapat lang suno diri nga kwestyunon kag indi pagbatunon sang presidente.
Sa pihak nga bahin, gin-aku sini nga may pagnubo sa produksyon sang kalamay sa Western Visayas kumparar sa nanligad nga tuig bangud sa pila ka mga factors kasubong sang kalamidad, pag-igo sang bagyong Odette kag back-to-back nga La Niña kag kulang ang suplay sini.
Apang, posible sa masunod nga bulan amat-amat na nga mastabilize ang presyo sang asukar bangud madungangan na ang mga millers nga magaoperate kag madungangan na ang suplay sang kalamay.
