ROXAS CITY – Nagtaas ang Suggested Retail Price (SRP) subong nga tuig 2022 ikumparar sa SRP sang 2019 sang mga produkto ukon “basic goods and prime commodities” sa idalom sang Department of Trade and Industry (DTI).
Ini ang ginkumpirmar ni Mrs. Ken Quennie Cuñada, Provincial Director sang DTI-Capiz sang ma-interview sang Bombo Radyo.
May dako nga paghulag sa presyo sang mga produkto kapareho sang bareta nga sabon nga yara sa 3.03% kag mineral water nga yara sa 6.17%.
Apang gintul-id ni Cuñada nga intsakto kag wala nagpasobra ang mga manugbaligya ba-se sa ila monitoring.
Apisar may paghulag sa presyo sang iban pa nga mga nagapanguna nga balaklon, suno kay Cuñada indi ini mabatyagan bangud sa gamay lamang ang pagpataas.
Ginsiling sini, ang produkto nga may mas dako nga pagtaas sa Capiz amu ang asukar, apisar indi ini sakop sa monitoring sang DTI, ginlakip ini nila sa gihapon bangud nagpangayo sang bulig sa ila ang DA.
Subong nga semana, P93-P106 ang taas sa kada kilo sang refined white sugar kag P68-P85 naman sa brown sugar.
Sa pihak nga bahin, ginsiling ni Cuñada nga sa ila monitoring kahapon wala na sang stocks ang pila ka mga school supplies ilabi na sang notebook, wala man nagpataas sang presyo ang pila ka establisyemento apisar nagpataas sang 7% sa SRP, sa baylo, 20% pa ang ginpanubo bangud man sa naka stock na nga daan ang mga produkto nga wala nabakal sang pandemya.
