Ginaplano sang pamunuan sang Philippine Ports Authority (PPA) ang pagtaas sang storage fee sa mga pantalan para sa mga nakatengga nga kargamento sa Manila International Container Terminal (MICT).
Suno kay PPA General Manager Jay Santiago, ginaabuso na sang madamo nga negosyante ang storage policy sang PPA kag ginapabay-an lamang nga magpabilin ang madamo nga container sa pier sang mga ini.
Nagalutaw man sa pag-tuon nga nakasanayan suno sang mga negosyante/importer nga nga ipabilin na lamang ang ila mga container sa MICT kaysa dalh-on ang mga ini sa warehouse matapos ang clearance sang Bureau of Customs.
Nahibaluan nga gintun-an sang PPA ang mga ginahiwat nga konsultasyon sa grupo sang mga stakeholders agud mapag-desisyunan ini sa lalo nga madali nga tion.
Nagapati si Santiago nga ang pagtaas sang storage fee ang magatapna sa mga negosyante sa modus sini, maluwas pa sa dugang nga koleksyon para sa gobyerno.
Nahibaluan nga nagdangat lamang sa P600 kada adlaw ang bayad sa MICT samtang sa mga warehouse naman, nagahampang ang bayad halin sa P3,500 tubtob P5,000 kada adlaw.
Sa karon, ginapahayag nga may yara sang masobra 700 container ang nakatengga lamang sa pier kag kadam-an diri, gindeklarar bilang mga agricultural commodities.
Posible nga ginhungod naman ini sang mga importer samtang ginahulat nila ang pagtaas sang presyo sang mga nasambit nga produkto bag-o ipaguwa sa merkado.
Suno kay Santiago, makabig ini bilang simple nga hoarding, butang nga kinahanglan sang aksyonan gilayon kaupod sang iban pa nga ahensya sang gobyerno.
