Napasakaan na sang kaso ang subject person ng nadakpan sa ginkasa nga drug buy-bust operation sa Barangay Binuntucan, Pontevedra, Capiz.
Ang subject person amo si alyas “Mat” isa ka negosyante kag residente sang Barangay Hipona, Pontevedra, Capiz.
Sa interview sang Bombo Radyo kay Police Captain Dennis Losbañes, Officer-in-charge sa Pontevedra Municipal Police Station, iya ginpahayag nga madugay na nila nga ginamonitor ang amo man nga subject person kag natigayon ini nga madakpan.
Suno pa kay Losbañes, ang subject person ang yara man sa Barangay Anti-Drug Abuse Council ukon BADAC watchlist.
Narekober naman sa paghinakop ang 6 tanan ka heat-sealed transparent sachet nga ginapatihan shabu nga ginabulubanta may kabug-aton nga 5 grams kag may standard drug price nga P34,000.
Pahayag pa niya, nakuha man sa subject person ang isa ka unit sang 38 caliber revolver kag tatlo ka bala nga wala sang serial number.
Dugang pa sini, magapangatubang sang kaso ang nasambit nga indibidwal nga paglapas sa RA 9165 ukon Comprehensive Dangerous Drugs Act of 2002 kag RA 10591 ukon ang Comprehensive Law on Firearms Ammunition.
Nagpanawagan man ang natungdan sa bilog nga pumuluyo sang Pontevedra nga kon sin-o man ang naga-engage sa paggamit kag pagduso sang iligal nga droga nga untaton na agud mapabilin ang kalinong kag katawhay sang palibot.
