ROXAS CITY – Nagpadala sang sulat ang tagdumalahan sang Cals Poultry Supply sa talapatan ni Negros Occidental Governor Eugenio Jose Lacson, nga nagahinyu tugutan na sila magsuplay sang itlog kag manok sa probinsya matapos nagpaguwa sang advisory ang Department of Agriculture (DA) nga bird flu free na ang Capiz.
Ini ang ginpahayag ni Mr. Ian Peter Adonay, Sales Manager sang Cals sang mainterview sang Bombo Radyo.
Suno diri, humalin sang nakarekord sang labing una nga kaso sang bird flu ang Capiz sang Disyembre 2 sang tinalikdan nga tuig, gindumilian sang Negros ang pagsulod sang poultry products nga magagikan sa Panay Island.
Bangud sini, tuman nga naapektuhan ang negosyo sa Negros kag Capiz.
Gani, daku gid ang pasalamat niya nga hilway na sa bird flu ang Capiz bangud nagakahulugan ini nga magabukas na ang pila ka mga lugar para sa poultry products nga magagikan sa probinsya.
Samtang, gintuad pa ni Adonay nga apisar wala pa nag-anunsyo ang DA, nagapabilin nga bastante ang suplay sang manok kag itlog sa probinsya.
