ROXAS CITY – Yara na karon sa kustodiya sang Tapaz MPS ang suspek sa pagbuno-patay sa isa ka menor de edad nga lalaki sa Brgy. Camburanan sa nasambit nga banwa matapos nga maaresto sang mga kapulisan pinaagi sa ginapatigayon nga hot pursuit operation.
Ini ang ginkumpirmar ni PMaj. Jhon Almarino Bonior, hepe sang Tapaz MPS sang mainterview sang Bombo Radyo.
Suno sa hepe, naaresto ang suspek sa iya mismo nga ulumhan sa Brgy. Agcococ lakip na ang menor de edad sini nga hinablos nga ginapahayag involved man sa nasambit nga insidente.
Sa pagpangusisa naman sang mga kapulisan sa background sang nasambit nga suspek, gintuad sang pila ka mga barangay officials sang Brgy. Agcococ nga may yara anay nga insidente nga natabo sa ila barangay kung sa diin ginluthang man sang suspek ang kaugalingon sini mismo nga amay kag ginatudlo man ini nga responsable sa mga kinawatay nga nagakatabo sa ila nga lugar.
Ginapreparar naman karon sang mga kapulisan ang mga nagakaigo nga dukomento sa pagpasaka sang kaso nga murder batuk sa suspek.
Sa karon, ginapadalman pa sang Tapaz PNP ang ila imbestigasyon sa madalum nga motibo sang suspek sa pagbuno-patay sa biktima.
Matandaan nga wala na makasalbar sa kamatayon ang biktima matapos mag-angkon sang patal nga pilas sa dughan tuga sang pagpangbuno sang suspek gamit ang wala pa matumod nga hinganiban nga ginhingagaw pa nga madala sa Tapaz District Hospital apang gindeklarar nga dead on arrival.
