ROXAS CITY – Napasakaan na sang kaso ang barangay tanod nga suspek sa pagluthang-patay sa kaupod sini nga tanod sa Barangay Magalab-I, Cuartero, Capiz.
Kaso nga Murder ang ginpasaka batuk sa suspek nga si Henry Leagogo kag wala sang ginrekomendar nga piyansa ang korte para sa iya temporaryo nga kahilwayan.
Nahibaluan nga base sa imbestigasyon sang mga kapulisan nga samtang nagakaon ang biktima nga si Geronimo Candido sa balay sang iya kakilala sang ginaalegar ginluthang ini sa likod sang suspek nga si Leagogo gamit ang ginapatihan nga .45 caliber nga armas-luthang.
Bangud diri, nag-angkon naman sang tatlo ka patal nga pilas sa lawas ang biktima nga gilayon naman gindala sa ospital apang gindeklarar naman ini nga dead on arrival.
Boluntaryo naman nga nagsungka ang suspek kasunod sang nasambit nga krimen.
