ROXAS CITY – Nakahunong na sa karsel sang Roxas City Police Station ang suspek sa pagpangbuno sa security guard sa isa ka kalduhan sa San Roque Extension, Barangay 8, Roxas City.
Matandaan nga ginkilala ang suspek kay alyas “Dante”, 32 anyos kag residente sang Brgy.Cogon, Roxas City, samtang ang biktima naman ang ginkilala kay alyas “Dennis” yara sa legal nga pang-edaron kag residente sa banwa sang Pontevedra.
Sa interview sang Bombo Radyo sa Officer In Charge sang Jamindan Municipal Police Station nga si PLT. Lebirato C. Cagampang Jr., ginpahayag sini nga natigayon nga madakpan si alyas “Dante”, pinaagi sa pagreport sa ila sang isa sa mga miyembro sang Criminal Investigation and Detection Group (CIDG) sa banwa sang Jamindan nga may yara sang nag-ako sa iya nga nakabuno ini.
Suno kay Cagampang, gilayon nila nga ginverify kag didto nakumpirmar nga may natabo nga pagpangbuno nga insidente sa lugar.
Mahibaluan nga natigayon nga madakpan ang suspek sa Barangay Jaena Sur, Jamindan, Capiz.
Sa karun, padayon pa nga ginabulong ang biktima sa ospital matapos nga nag-angkon sang pilas sa sa dughan kag sa iya nga tiyan tuga sang pagpangbuno.
