TAPAZ, CAPIZ – Suspek nga nakapalagyo matapos nakumiter ang pagpangluhang-patay sa isa ka mangunguma sa banwa sang Tapaz, padayon nga ginaayam sang mga kapulisan.
Matandaan nga nag-angkon sang patal nga pilas sa dughan ang isa ka mangunguma, matapos ginluthang-patay sa Barangay Abangay sa banwa sang Tapaz.
Ginkilala ang biktima kay alyas “Poldo”, 41-anyos kag residente sang nasambit nga lugar samtang, ang ginatudlo naman nga suspek ang ginkilala kay alyas “Gardo”, 36-anyos kag residente naman sang Brgy. Nayawan sa nasambit nga banwa.
Sa interview sang Bombo Radyo kay PSMS Roman Gueta, imbestigador sang Tapaz MPS, ginpahayag sini nga ginpaidalom sa post-mortem examination ang bangkay sang biktima agud madugang sa pagplastar sang nagakaigo nga panumbungon batuk sa suspetsado.
Dugang pa ni Gueta, wala man sang record sa barangay ukon sa ila istasyon ang suspetsado apang, masami ini nga nagtuga sang inaway kag posible nga naakig ini sang gin-agbayan ini sang biktima.
Nahibaluan nga samtang nagalakat ang suspek sa amo nga lugar sang hinali nalang nga gin-agbayan sang biktima ang suspek sa abaga kag makaligad ang pila ka segundos gintiro sang suspek ang biktima.
Bangud sa natabo, nag-angkon sang patal nga pilas sa dughan ang biktima tuga sang pagpangluthang gamit ang ginaalegar nga 12 gauge pistolized homemade shotgun nga armas-luthang.
Sa karon, ginapadalman pa ang ginahiwat nga imbestigasyon sang Tapaz PNP sa nasambit nga insidente.
