ROXAS CITY – Na-release sa karsel sang Dao Municipal Police Station ang lalaki nga suspek sa pagpangtiro sa mag-asawa sa Barangay Matagnop, Dao, Capiz.
Nahilway ang suspek nga si Jimmy Dordas matapos nag-lapse ang iya nga reglementary period of detention.
Mahibaluan nga wala pa makapasaka sang nagakaigo nga panumbungon sa piskalya ang mga biktima nga sanday Gerardo Enesario, retirado nga pulis kag asawa sini nga si Norma Enesario sang Barangay Ilas Norte, Dao, Capiz.
Ini bangud ila pa nga ginahulat ang resulta sang ila nga medical examination.
Base sa inisyal nga impormasyon nga nakuha sang Bombo Radyo gikan sa Dao Municipal Police Station, samtang masako ang mag-asawa sa pagkuha sang ila mga kagamitan sa ila daan nga balay, hinali na lamang nagpalapit ang suspek nga si Jimmy Dordas.
Diri kag ginapahayag nagbaisay ang magtimbang nga bahin tubtob sa nabatian na ang asud-asod nga lupok sang armas-luthang.
Nakaangkon sang mga pilas sa paa ang mag-asawa tuga sang pagpangtiro sang suspek rason nga gilayon sila nga gindala sa Dao District Hospital agud mabulong.
Wala naman sang anuman nga pilas ang suspek nga boluntaryo nga nagsungka sa mga kapulisan bitbit ang iya Glock17 nga armas luthang nga may magazine kag 13 ka mga bala sang caliber .9mm.
