ROXAS CITY – Dakop sa ginkasa nga operasyon sang Criminal Investigation and Detections Group (CIDG)- Capiz sa Barangay Talon sining syudad ang ginakabig suspek sa pila ka serye sang pagpanghold-up kag pagpangawat sa syudad sang Roxas.
Ginkilala ang suspek kay Joan Jimenez alyas “Putol” kag residente sang Barangay Dinginan, Roxas City.
Nakuha sa posesyon sini ang Caliber .38 nga armas-luthang nga may yara sang tatlo ka bala, isa ka granada, kag 1 sachet sang ginaalegar shabu.
Sa interview sang Bombo Radyo kay PLT. Danilo Matahum, OIC sang CIDG-Capiz, suno diri masobra sa isa ka bulan ang ila pag-monitor kay alyas “Putol” antes ini nadakpan kun sa diin nagpadulong sa Barangay Talon sa iya kalive-in partner.
Suno diri, kilala man si Jimenez sa pagbaligya sang ilegal nga droga kag indi lisensyado ang armas nga narekober sa iya.
Magapangatubang si alyas “Putol” sang panumbongon nga paglapas sa R.A 10591 ukon “Illegal possesion of firearms”, R.A 9165 ukon “Comprehensive Dangerous Drugs Act of 2002”, kag R.A 9516 ukon iligal nga paghupot sang explosive device.
Sa karon, yara na sa pag-inakop sang CIDG- Capiz si Jimenez para sa nagakaigo nga disposisyon.
