Ginreklamo ni Vice President Sara Duterte ang 60-day suspension ni Cavite 4th District Representative Francisco Barzaga, nga ginatawag ini nga kabahin sang serye sang mga tikang agud mapahipos ang mga nagahambal sang indi komportable nga kamatuoran.
Matandaan nga ang House Ethics Committee nagpatuman sang suspension kay Barzaga bangud sa ginaalegar lewd photographs kag “ostentatious display of wealth.”
Suno kay Duterte, indi ini ang una nga kahigayunan nga ginsilutan ang mga kritiko sang gobyerno. Gintumod sini ang gin-alegar nga pagpangidnap sa anay presidente kag ang pagpasaka sang kaso nga inciting to sedition batok sa pila ka mga indibidwal, lakip na ang iya kaugalingon, bangud sa pagpangusisa sa mga yara sa poder.
Ginhatagan niya sang igtalupangod nga ang pagsupak indi dapat kabigon nga isa ka pamahog kag ang kinamatarong sa paghambal isa ka “fundamental right” nga ginaamligan sang Konstitusyon.
Dugang pa sang Bise Presidente, may kinamatarong ang tagsa ka Pilipino, ilabi na ang public servants, nga magsugid sang matuod.
Pahayag pa niya, ang demokrasya nagakinahanglan sang kaisog, kahilwayan sa paghambal, kag kinamatarong sa pagpamangkot.
