ROXAS CITY, CAPIZ – Ginalauman sang Provincial Disaster Risk Reduction and Management Office (PDRRMO) sa Capiz nga matalakay sa ika-apat nga State of the Nation Address ni President Ferdinand “Bongbong” Marcos Jr ang sustainable nga mga programa sang administrasyon para sa food security, kag infrastructure development sa pungsod.
Sa interview sang Bombo Radyo Roxas kay Atty. Sheila Artillero, head sang PDRRMO-Capiz, iya ginpahayag nga indi pa masiling nga sustainable sa karon ang food security sa pungsod bangud padayon nga mataas ang presyo sang mga balaklon, bulong kag balayran sa ospital. Ginpunto niya nga kinahanglan ang mas malig-on nga social services kag mas maayo nga access sa healthcare, ilabi na sa mga pigado nga sektor.
Dugang pa sang natungdan, ginalauman sang ila ahensya nga may plano ang presidente para sa sustainable infrastructure kag flood control projects, bangud sa mas nagalain nga epekto sang kalamidad kaangay sang bagyo kag habagat nga naglabay sang damlag lang.
Ginhatagan pagtamod ni Atty. Artillero ang epekto sang climate change, nga nagadala sang indi normal nga pagbaha kag malain nga tyempo, rason nga dapat mangin prayoridad ang mga inisyatibo nga naga-address sini nga isyu.
Ginalauman man sini ang implementasyon sang livelihood projects kag educational reforms nga magahatag sang dugang nga oportunidad sa mga pumuluyo, ilabi na sa kabataan.
Pahayag pa ni Atty. Artillero nga madamo ang ginalauman nga matalakay sa SONA sang Presidente nga luyag mabatian kag mabatyagan sang mga pumuluyo.
– Interviewed by: Bombo Roadnie Daban Dalanon
