ROXAS CITY – Nagdangat sa P37,000 nga balor sang cellphone load ang natigayon nga mapa-load sang tag-iya sang isa ka pension house sa Barangay Poblacion Sur, Ivisan, Capiz, sang isa ka nagpakilala nga si Vice Governor Sicad.
Ba-se sa report may nagpanawag kay Zenaida Ong tag-iya sang pension house sa lugar kag nagpakilala nga si Vice Governor Sicad kag nagpareserve sang hulot nga teniran.
Matapos ang transaksyon liwat nagpanawag ang caller kag nagrequest sang wine nga iya paga-imnon pag-abot sa pension house , rason nga ginsugo ni Ong ang menor de edad nga anak nga magbakal sa isa ka convenient store.
Liwat nagpanawag ang caller kag nagpa-load sang P3,000 nga gintuman naman sang mag-iloy nga Ong.
Apang kasubong wala nakuntento ang caller kag liwat nagpanawag kag nagpadugang sang load sa magkatuhay nga numero sa cellphone sa balor nga P5,000 nga gintuman sang mag-iloy nga Ong, tobtob naglab-ot sa P37,000 tanan nga balor sang cellphone load ang ila ginload sa magkatuhay nga numero nga ginhatag sang nagpakilala nga si Vice Governor Sicad.
Gani sang liwat nga nagpadugang sang load ang caller, kasubong nabinag binag na sang mag-iloy nga ginatunto sila kag ginpalab-ot sa mga Ivisan PNP ang insedente nga gilayon nagpatigayon sang imbestigasyon.
