ROXAS CITY – Nag-appoint sang panibag-o nga mga opisyal sa kada section sang Teodoro Arcenas Trade Center (TATC) ang alkalde sang syudad nga si Mayor Ronnie Dadivas.
Ini ang ginkalakipan sang Fish Vendors Association nga ginapamunuan ni Dionisio Rose, Elias Cabarles sang Agri-Dry Goods, Cereals Retailers Association ni Edilberto Cambe kag bag-o nga presidente sang Meat and Poultry Section nga si Roberto Roldan.
Ini ang ginkumpirmar ni Efren Diaz, Chief Security in-charge sang TATC sang mainterview sang Bombo Radyo.
Suno kay Diaz, isa sa mga rason sa pagbaylo sang bag-o nga opisyal amu ang mahinay nga pag-aksyon sa mga reklamo kag problema sa sulod sang TATC.
Antes ang pag-appoint sang panibag-o nga opisyal, may natabo nga pagsinapol agud ipahibalo sa mga anay opisyal ang pag-appoint sang mga bag-o nga presidente ilabi na sa fish section kag Meat and Poultry Section.
Ginsiling man ni Diaz nga nakadepende sa performance sang mga opisyal ang kadugayon sang pagpungko sa pagpamuno sa mga nasambit nga asosasyon.
Nagasalig si Diaz nga sa pagdumala sang bag-o nga opisyal magapabilin ang katawhay kag katinlo sa amu nga merkado.
