TAPAZ, CAPIZ- Arestado ang tatlo ka mga indibidwal sa isa ka anti-illegal gambling operation nga ginpatigayon sang Tapaz Municipal Police Station sang kaagahon sang Enero 25, 2026 sa Barangay San Pedro, Tapaz, Capiz.
Ang mga nadakpan amo sanday alyas “Jun,” “Bot,” kag “Toto,” lunsay yara sa legal nga pang-edaron kag mga residente sang nasambit nga banwa.
Sa impormasyon nga nakuha sang Bombo Radyo nagikan sa Tapaz Municipal Police Station, ginapahayag nga takna las 12:13 sang kaagahon ginpatigayon ang nasambit nga operasyon.
Dugang diri, nadakpan ang mga ini nga nagapatigayon sang iligal nga huygo nga kilala bilang ‘cara y cruz’. Pila ka mga ebidensya ang narekord sa lugar sang insidente.
Sa subong, yara na sa kustodiya sang Tapaz Municipal Police Station ang mga nadakpan kalakip sang mga nakumpiskar nga ebidensya para sa nagakaigo nga disposisyon kag pagpasaka sang nagakaigo nga kaso may kaangtanan sa paglapas sa Presidential Decree No. 1602 ukon ang layi batok sa ilegal nga huygo.
