ROXAS CITY – Ginkumpirmar ni Brgy. Tanque Punong Barangay Anita Bitoon nga pangayaw ang tatlo ka persona nga nadakpan matapos ginsalakay sang PDEA-Capiz ang balay nga ginhimo drug den sa St. Francis Subdivision, Brgy. Tanque, Roxas City.
Sa interview sang Bombo Radyo kay PB Bitoon, may nagpalab-ot sang reklamo sa ila talatapan nga indi makatulog kun gab-i ang mga kasilingan sang gin-raid nga balay bangud sa gahod nga kaangay may naga-grinder.
Dugang pa sini nga gin-report man sa ila nga may nagapakadto-pakari nga indi kilala nga mga tawo sa amu nga lugar ilabi na sa kagab-ihon.
Gintuad man ni Bitoon nga gintuyo na nila nga magpangusisa sa amo nga balay apang wala ini sang tawo kun adlaw.
Indi man siya suno diri makapati nga may iligal nga aktibidad sa amu nga balay bangud Subdivision man ang lugar.
Matandaan nga narekober sang PDEA-Capiz ang 16 tanan ka sachet sang ginapatihan shabu sa amu nga balay matapos ang ginkasa nga drug buybust operation.
Naaresto ang tatlo ka persona nga sanday Gilbert Ablero Fadrique, Achilles Baltazar Dilla kag May Casugbo Cordovero.
Naglab-ot naman sa masobra P400,000.00 ang balor sang iligal nga droga ang nakumpiskar sa mga nagkaladakpan kalakip ang P1,000.00 buybust money, kilohan kag drug paraphernalias.
Magapangatubang sang kaso nga Republic Act 9165 ukon Comprehensive Dangerous Drugs Act of 2002 ang nasambit nga mga arestado.
Sa karon nagapabilin ang mga ini sa kustodiya sang mga otoridad para sa nagakaigo nga disposisyon.
