ROXAS CITY – Pilason ang duha ka mag-utod kag isa pa ka persona matapos ang nagluntad nga insidente sang pagpangbuno sa isa ka Peryahan sa Hermano Subdivision, Barangay Punta Tabuc, Roxas City.
Ginkilala ang mga nagkalapilasan nga sanday alyas Arnel, 20-anyos, alyas Angelo, 22-anyos nga lunsay mga residente sang nasambit nga Barangay kag alyas James, 22-anyos nga residente naman sang Brgy. V, Roxas City.
Sa inisyal nga imbestigasyon sang kapulisan, base sa CCTV footage nga nakuha sa ginluntaran sang insidente, makit-an si alyas Angelo kaupod ang iya manghod nga si alyas Arnel nga madasig kag agresibo nga nagsulod sa nasambit nga “Peryahan”.
Pagkatapos sini, may nagluntad nga mainit nga pagbinaisay nga nagtuga sang komosyon sa tunga sang mag-utod nga si Angelo kag Arnel batuk kay alyas James kag manghod sini nga si alyas Leo.
Ginapahayag nga nagresulta sa rumble ang mainit nga komosyon sa lugar. Bangud sa natabo, nag-angkon sang pilas sa iya dughan kag tiyan si alyas Angelo samtang pilas naman sa tiyan kag ulo ang naangkon sang iya manghod nga si Arnel. Sa pihak nga bahin, nag-angkon man sang pilas sa likod si alyas James.
Gindala naman sa separado nga ospital ang mga nagkalapilasan.
Sa karon, nagapadayon ang imbestigasyon sang mga kapulisan angud sa insidente.
