ROXAS CITY – Ginklaro ni City Mayor Ronnie Dadivas nga wala pa sang anuman nga makapamatuod nga may yara sang local transmission sang coronavirus disease (COVID-19) sa Roxas City kasunod sang pag-positibo sa amo nga balatian sang isa ka 33 anyos nga lalaki nga isa ka foreign national.
Suno kay Dadivas, indi sang matuod nga wala sang travel history sa luwas sang probinsiya sang Capiz ang amo nga lalaki bangud sa ila pagpangusisa, natukiban nga makaduha ka beses ini nga nag-biyahe padulong sa Iloilo.
Ginpahayag sang alkalde nga mismo ang amo nga foreign national ang nagpaidalom sa iya kaugalingon sa real-time polymerase chain reaction (RT-PCR) test sa Iloilo bangud natalana kuntani ini nga magbalik sa pungsod nga iya ginhalinan.
Apang sa iya ikaduha nga pagpadulong sa Iloilo, nagguwa ang resulta nga positibo ini sa amo nga balatian.
Sa karon suno sa alkalde, yara na sa Roxas Memorial Provincial Hospital ang amo nga pasyente matapos makitaan sang pila ka sintomas.
Gilayon man nagpatigayon sang contact-tracing sa mga nakahalubilo sini kun sa diin ang iya pamilya ang ginpaidalom na sa strict home quarantine kag ginpaidalom man sa swab tests.
