Nagtalana na sang kondisyon ang Timor-Leste antes pahanugutan ang pag-deport sa ginpahalin nga mamalidha nga si Arnie Teves Jr suno kay National Bureau of Investigation (NBI) Director Jaime Santiago.
Lakip diri ang certificate of handover nga nagamando nga dapat tratuhon sang makatawo si Teves kag indi pag-ipreso sang masobra 40 ka tuig.
Gin-athag sang hepe sang NBI nga sa idalum sang Article 70 sang Revised Penal Code, ginalimitahan sang 3-fold rule ang kabug-usan nga tion nga mahimo maserbe sang isa ka convict ang iya sentensya sa prisuhan bisan sa madamo nga panumbungon. Ang pinakamataas nga sentensya sa kulungan para sa isa ka nahukman nga tawo amo ang 40 ka tuig, bisan ano man ang kabug-at sang sentensya.
Ang dugang nga kondisyon amo nga indi dapat ipaidalom sa torture si Teves kag dapat nga i-detain sa mga detention facilities nga nagasunod sa international standards.
Nasaad man diri nga indi dapat pagsentensyahan sang kamatayon si Teves kag dapat hatagan sang patas kag publiko nga pagbista base sa kasuguan sang Pilipinas.
