ROXAS CITY – Ginbawian sang kabuhi ang 53-anyos nga tiyo matapos nga ginaalegar ginluthang sang iya hinablos takna 10:50 kagab-i, Pebrero 5 sa Barangay Agcabugao, Cuartero.
Ginkilala ang biktima nga si Cornillo Estorque, 53-anyos residente sang Barangay Maindang samtang ang suspek amu si Rafael Contreras residente sang Barangay Agcabugao sang nasambit nga banwa.
Sa impormasyon nga nakuha sang Bombo Radyo, ginapahayag yara sa idalum sang makahulubog nga ilimnon ang biktima sang nagpadulong sa balay sang iya hinablos, sang may nagluntad nga indi pag-intindihanay sa tunga sang duha.
Ginapahayag magapauli na kuntani ang biktima sang hinali na lang ini ginluthang sang hinablos sang makatatlo ka beses nga nagresulta sa pag-angkon sang igo sa ulo kag nagkalain-lain nga parte sang lawas.
Wala naman natumod kun yara man sa impluwensya sang makahulubog nga ilimnon ang suspek sang natabo ang pagpangluthang.
Samtang, natigayon nga madakpan ang suspetsado pinaagi sa ginpasangkad nga hot pursuit operation sang kapulisan.
Nagapadayon naman ang imbestigasyon sang kapulisan angut sa insidente.
#BastaRadyoBombo
