ROXAS CITY – Ginahulat na lamang sang Traffic Management Unit (TMU) ang “go signal” ni Mayor Ronnie Dadivas kag pag-aprobar sini sa dugang nga 15 traffic personnels agud masuguran na nila ang pagpangdakop sa mga colorum nga traysikol nga nagabiyahe kun gab-i.
Sa interview sang Bombo Radyo kay Mr. Gonzalo Andrada, head sang TMU Roxas, ginsiling sini nga kun maaprobahan, 7 sa 15 nga mga personnels ang magabantay kada gab-i.
Igapaidalom naman sa training kag seminars ang 15 ka panibag-o nga personnels agud mangin pamilyar sa mga ordinansa may kaangtanan sa trapiko nga naga-eksister sa syudad sang Roxas.
Apang wala pa ini siya sang intsakto nga petsa kun san-o magasugod bangud indi man mahimo nga ang mga traffic auxillary pa nga nagaduty sa aga ang iya ipahamtang kada gab-i bangud indi man ini sarang sang bilog nga adlaw nga pagtrabaho.
Ginpahayag naman ni Gonzalo nga samtang wala pa sila nagasugod, plano sini sa nagahilapit nga face-to-face class nga pahamtangan sang traffic auxiliaries ang pila ka mga karsada malapit sa bulutho-an sa syudad.
