ROXAS CITY – Nagapadayon ang pagpangdakop sang Traffic Management Unit (TMU) batuk sa mga nagabiyahe sang colorum nga traysikol sa syudad sang Roxas.
Suno kay Mr. Gonzalo Andrada, head sang TMU Roxas, nagligad nga semana may yara sang mas o menus 15 ka mga colorum nga tricycle ang nagkaladakpan kag buwas nga adlaw magahatag na sila sang final data ukon numero sang mga nagkaladakpan kun sa diin kada katapusan sang bulan sila nagapasa sang reports.
Gintuad sini nga kulang ang ila personnel rason nga wala may naga-operate kun gab-i apang posible sa masunod nga semana may 15 ka mga bag-o nga personnel ang magadugang agud magbantay kada gab-i kaupod ang mga kapulisan sang syudad.
Dugang pa ni Andrada nga hugot ang ila pagbantay subong kag magabayad sang penalidad kun sin-o man ang ila madakpan gani panugyan niya sa mga pasahero nga indi na magsakay sa mga colorum nga tricycle bangud disbentaha lamang ang makuha diri, amu man sa mga nagamaneho sang colorum nga magkuha na lamang sang nagakaigo nga permit agud mangin legal na ang ila pangabuy-anan.
