Arestado ang isa ka lalaki sa kaso nga Attempted Homicide nga ginakabig nga Top 3 most wanted person municipal level sa Barangay Poblacion, Jamindan, Capiz.
Ang arestado amo si alyas Kaboy, 56-anyos kag residente sang Barangay Jaena Norte sang amo nga banwa.
Sa interview sang Bombo Radyo kay Police Captain Jaypee Silvestre, Officer in-charge sang Jamindan Municipal Police Station, iya ginpahayag may nabaton ini nga impormasyon nga yara ang subject sa belasyon kag gilayon ini nga gin-verify kag ginserbe ang gahum sang arrest warrant.
Suno kay Silvestre, ang amo nga arrest warrant ang permado ni Hon. ROMMEL L. LEONOR, Acting Presiding Judge sang 5th Municipal Circuit Trial Court Jamindan, Capiz.
Sa subong, yara na ini sa kustodiya sang Jamindan Municipal Police Station, para sa nagakaigo nga disposisyon.
