Arestado ang 38-anyos nga guwardiya matapos nga nagkuha sang police clearance sa Satellite Hub sa isa ka mall sa Barangay Lawaan, Roxas City.

Ginkilala ang akusado kay alyas “Jobert” kag residente sang Sitio Upper Sampaloc, Calizo, Balete, Aklan.

Nahibaluan nga ginakabig ini bilang isa ka Top 6 Most Wanted Person sa Municipal level sa Calamba City, Laguna ang nasambitan nga akusado.

Sandig sa impormasyon nga nakuha sang Bombo Radyo nagikan sa Roxas City PNP, ginapahayag nga makuha lang kun tani ang nasambit nga persona sang police clearance apang nahibaluan nga may ginapangatubang ini nga kaso nga Eight Counts of Anti Child Abuse Law of Repubulic Act 7610 kag may ginrekomendar ang korte nga piyansa sa kada counts nga nagabalor sa kapin P180,000 para sa temporaryo sini nga kahilwayan.

Ang warrant of arrest ang ginpapanaog kag ginpirmahan ni Presiding Judge Ave Zurbito- Alba, sang RTC, 4th Judicial Region, Branch 8, Calamba City, Laguna nga napetsahan sadtong Disyembre 1, 2021.

Sa karon, nagapabilin ini sa kustodiya sang Roxas City PNP kag natalana nga i-turn over sa court of origin.