ROXAS CITY – Naglain ang buot sang isa ka traffic auxiliary matapos ginpakahuy-an kag ginpahog sang isa ka babaye nga sakay sa salakyan nga iya ginsita bangud sa iligal nga pagparked sa Burgos Talipapa, Burgos Street, Roxas City.
Ini ang ginpahayag ni Jonie Alabot sang ma-interview sang Bombo Radyo Roxas.
Ba-se sa panaysayon ni Alabot nga ginbilin sang driver nga si Mildred Galagate, ang salakyan sa nawala nga porsyon sang karsada, apang bangud bawal ini iya ginhambalan ang ginang nga i-park sa natuo nga porsyon sang salakyan.
Apang ginkakibot sang traffic auxiliary bangud sa baylo nga magpati sa iya, ginmulay pa ini sang babaye kag ginkwestyon kun nahibaluan sini ang iya nga trabaho.
Nagtuyo pa si Alabot nga magpakig-estorya sa babaye apang ginsinggitan kag ginbuyayaw siya kag ginduro-duro rason nga gintapi sini ang kamot ni Galagate.
Apang nagkalma lamang ini sang may nag-abot na nga pulis kag ginpakamaayo nga dal-on sila sa Roxas City Police Station agud ma-istoryahan sang matawhay ang natabo.
Nagahinyo si Alabot nga kuntani respetohon sang mga motorista ang mga traffic auxiliary bangud nagapatuman lamang sila sang layi.
