ROXAS CITY – Nagpadulong sa talatapan sang barangay hall sa Tanque si Reynaldo Francisco, traffic auxillary, agud ireklamo si alyas “Kapid” nga diutayan lang magbuno sa iya matapos gindakop ini sang iya kaupdanan sa TMU bangud sa pagbiyahe sang colorum nga tricycle.
Sa interview sang Bombo Radyo kay Punong Barangay Hermina Dello, Kapitan sang Barangay Tanque sining syudad, iya ginsiling nga ginkadtuan niya si alyas “Kapid” sa balay sini apang iya asawa ang nag-atubang kag ginpahayag wala ang iya bana sa ila balay, apang ginsiguro man sini nga kun mag-abot magapadulong ini sa barangay hall.
Nagpadulong ang mag-asawa sang hapon sa barangay hall kag ginpatawag man ni kapitan si Francisco kag diri niya ginhinala ang duwa ka magtimbang nga bahin.
Suno kay kapitan Bello, ba-se sa nangin hinun-anon nila ni alyas “Kapid” indi sini tuyo nga bun-on ang traffic auxillary kag panghana gid lamang ang iya ginhimo, nahibaluan suno diri ni alyas “Kapid” nga bawal ang iya pagbiyahe apang wala siya nagauntat bangud sa ini lang ang iya pangabuy-anan nga nagabuhi sa iya pamilya.
Gintinguhaan naman sang punong barangay nga mahusay ang duwa apang suno diri indi pa desidido si Francisco nga magpatawad kag luyag sini pasakaan sang panumbungon si alyas “Kapid”.
Nakaimpound naman ang naulamid nga traysikol sa TMU kag natalana ang duwa sa ikaduwa nga paghusay sa barangay.
