ROXAS CITY, CAPIZ – Nagapanawagan sang gilayon nga aksyon ang grupo nga Water Watch Advocates (WWA) kaangut sang nagalala nga krisis sa supply sang tubig sa pila ka bahin sang pungsod.
Sa interview sang Bombo Radyo Roxas kay Wennie Sancho, convenor sang Water Watch Advocates, iya ginapahayag nga kinahanglan nga magpatigayon sang maid-id nga imbestigasyon agud matumod kun sin-o ang dapat manabat sa krisis sa tubig.
Suno kay Sancho, indi dapat pagtabunan ang mga iregularidad kag kapalpakan sa pagdumala sa mga water service providers.
Dugang pa sang natungdan, ang administrasyon ni Marcos ang may salabton kag mapasiguro nga naprotektahan ang kinamatarong sang kada pumuluyo sa malimpyo kag maayo nga supply sang tubig.
Pahayag niya, ang tubig indi pribilehiyo kundi isa ka nagapanguna nga kinamatarong.
Ginganyat man sang grupo ang publiko nga mangin vigilante kag makig-isa sa panawagan para sa transparency kag accountability sa mga ahensya nga may kahilabtanan sa tubig.
Nanindugan ang Water Watch Advocates nga padayon nila nga bantayan ang ini nga isyu agud indi na maliwat ang pareho nga krisis sa iban pa nga bahin sang pungsod.
