ROXAS CITY – Ginalauman nga 90 porsyento sang operators kag drivers sa transport sector sa probinsiya sang Capiz ang magaupod sa malapnagon nga nationwide transport strike sa Lunes nga adlaw, Septiembre 30.
Ginpahayag ni Mr. Joerbert Carandang, presidente sang Hugpong Transport Capiz nga ginpasiguro sa iya sang mga transport leaders sa premier kag segundo distrito sang Capiz nga magaupod sila sa nasambit nga welga, agud ipakita ang ila nga pagpamatuk sa ginakabig bogus nga modernization program sang gobyerno.
Suno kay Carandang nga indi lamang mga operators kag drivers sang mga PUJ’s ang magaupod sa nasambit nga aktibidad, kundi kalakip ang mga van kag tricycle.
Ginapanindugan sini nga dapat nga ibasura ang ginaduso nga PUJ modernization program sang gobyerno bangud ginakuhaan sang palangabuy-anan ang mga operators kag drivers.
Gintawag man ni Carandang nga masaker ang ginahimo sang gobyerno sa ila palangabuy-anan.
Ginpanindugan sini nga wala nagapamatuk ang transport setor sa modernisasyon ukon upgrading sang mga jeepneys.
Ang ginapamatukan lamang sang grupo suno kay Carandang amo ang ginaduso sang gobyerno nga bayluhan ang naga-exister nga mga jeepney sang Euro-4 mini bus nga nagabalor sang P2 milyones pesos nga para sa ila indi praktikal.
Samtang nagpangayo ini sang paghangup sa mga commuters nga maintiendihan sila bangud tuyo sang ila pagwelga nga mapukaw ang gobyerno kag ibasura ang PUJ modernization program.
